My people I hail una. I dey my yard o na hin me and somebody begin to dey drag dis mata. No be small ting. You see I dey very happy say Nigerian woman enter that TIME 100 list. No be around this time wey everybody dey talk of Woolwich, dis winch, dat winch wey British men wey dem papa na Nigeria go kill Britiko soja for London. Everybody come dey point finger for Nigeria say na as Boko Haram dey take do be that. Make thunder fire that their hand.
Anyway, since this be pigeon talk, make I leave that tori for tortoise. The one wen make my belle sweet na hin I one talk. Una don ever imagine why na Omotola enter that TIME 100 list wey dem come comot Genevieve. The reason why I talk say dem comot Genevieve na because dem for don write long list and Genevieve name for dey there before dem come use red biro comot am.
Make we compare the two celebs na:
When we talk of fine, Omotola fine. She carry front, carry back join. Genevieve sef fine well well, she carry side, she carry back sef but me and you know say no be fine dem they use enter am.
As I take look am e be like say na the following places Omotola for take senior Genevieve, wey make TIME put Omotola Jalade name join.
Number of Fans:
Although Omotola Jalade get over 188, 000 followers for Twitter while Genevieve get over 330,000 Twitter followers, una go see say Omotola get over 18,000 tweets while Genevieve get like 5000 tweets. Wetin this mean? E mean say Omotola dey follow her people yarn well well for Twitter pass Genevieve. If you carry body follow me go Facebook, you go see say Genevieve get over 200,000 Facebook fans while Omotola over 1,000,000 (One Million Fans).
Professional Career (Acting):
For these period wey I remember, Omotola don show bodi for plenty films pass Genevieve. Genevieve no too dey show for film again. Na ontop advert na im we dey see am. You know say Genevieve like things wey carry money like Range Rover Evoque, MUD make-up and plenty tings like that. Omotola don appear for Ije, Last Flight to Abuja, Hit the floor, Amina, Ties that bind, A private storm lately. She don show face for over 300 home video for we country. Genevieve nko, she dey show face for Half of a yellow sun, Doctor Bello, Tango with me, The Mirror Boy, Sacred Lies, Bursting out and Ije for recent too.
For Charity nko, e be like say Omotola try well well pass Genevieve. E get one time, wen after she launch her album Omotola carry part of the proceeds go give the Heart of Gold Hospices and SOS children village in Isolo, Lagos. But Genevieve self no bad at all o. She create clothing line St. Genevieve and dey give some of the money wey dem make to charity. Charity no be person o. Na people wey no get wetin you get.
E fit be media hype wey make Omotola enter the list and no be Genevieve as Omotola Jalade get her own reality TV show; The Real Me. Maybe na that one TIME take look sey she be correct babe come enter put her name.
Me don tire for this talk o. I just dey wonder why na Omotola Jalade-Ekeinde enter TIME 100 list and no be Genevieve Nnaji. Me never talk say one person better pass the other. Make we sit down rub yansh together, make we nack head together reason why Genevieve no enter TIME 100 list. If you get talk wey you fit talk. Yarn am abeg. Na Pigeon English.